WACYI IYO WAANO

 WACYI IYO WAANO.   

MOWDUUCA: WAQTIGA IYO MUHIIMADIISA.     

Bismilaahi Ar- raxmani Ar- raxiim.

• Waqtigu waa waxa ugu qaalisan ee uu qofka ibnu aadamka ahi haysto inta uu nool yahay, waana raasamaalka ugu faa’iidada badan haddii si wacan looga faa’iidaysto oo loo qorsheeyo

• sida ay xikmaddani leedahay (waqtigu waa waxa nolosha laga sameeyo).

• Waxaa mar walba innagu waajib ah inaan waqtigeenna uga faa’idaysanno sida ugu habboon kagana faa’iidaysanno waxa Alle (SWT) raalligelinaya, si aad adiguna ugu noolaato nolol aad raalli ku tahay.

• Waxyaabaha aan kaga faa’iidaysan karno waqtigeenna maxaa ka mid ah?

1. Cibaado suubban oo aan Allihii ina abuurtay (SWT) ku caabudno oo aynu si wacan u garano sababta la inoo abuuray inay tahay in aan Alle keligiis (SWT) u caabudno waa ku Alle inoogu sheegay Qur’aanka (Jinka iyo insiga umaanaan abuurin inay na caabudaan mooyaane).

2. Innaga oo kaga faa’iidaysanayna cilmi aan baranno kaas oo noqonaya ka ina anfacaya nolosha adduunka iyo ta aakhira labadaba cilmigaas oo uu ugu horeeyo barashada kitaabka alle ee kariimka ah.

3. Ina aan nafaheena ku waajibino samaynta wanaagga, wanaaggaas oo aynu usamaynayno nafeheenna iyo walaalaheenna kaleba innaga oo ku caawinayna walaalaheen wax kasta oo wanaag ah sida (innaga oo wax wanaagsan farna, sadaqo siinna, dhib haysatey uga gargaarna, ka bukaanka ah soo booqanna, i.w.m.).

Ugu  danbeeyn:

• Waxa cirka lagu gaadhay waa waqti laga faa’iidaystay iyo buuraha figtooda, badda gunteeda waxaas oo dhana waxaa kasii saraysa janada fardaywasa ee ku dadaal saad if iyo aakhiraba ugu guulaysan lahayd kana faa’iidayso daqiiqada aad haysato.

BARNAAMIJKEENII "WACYI IYO WAANO." 

WACYI IYO WAANO.

 بسم الله الرحمن الرحيم.

Bismilaahi Ar- raxmani Ar- raxiim.                                                      

Shaki kuma jiro in wakhtigu yahay ra'sumaalka ugu muhiimsan ee qofku haysto inta uu nool yahay, taasi oo macanaheedu yahay in wax waliba oo uu waayo uu heli karo badalkiisa, tusaale ahaan lacagtu way timaadaa wayna baxdaa, cilmiga waa la bartaa waana la hilmaami karaa, Hadiise hal daqiiqo oo ka mid ah noloshaada ay kaa tagto waa mid aan dhacayn in dib laguugu soo celiyo, sidaa awgeed waxaa mudan in ay qiimo wayn yeelato halka daqiiqo ee noloshaada ka mid ah.

Sidookale Waxan wada ogsoonahay in aan hada ku jirno wakhti fasax ah oo dadka intii wax baranaysay iyo intii shaqaalaha ahayd badankooduba ay nasasho gaaban ku jiraan , ((inkastoo dadka qaar aysan fasax galin ama uu kadhamaaday fasaxii.)) taasi waxa ay keentaa in qofku helo wakhti badan oo firaaqo ah isla markaana uu kaga lumo waxyaalo badan oo marka uu dib isku xisaabiyo uu garto in uusan ka faa'idaysan wakhtigii dheeraa ee ka tagay intii uu fasaxa ahaa, dabadeedna uu dib isku canaanto wakhti ayna canaantaasi waxba tarayn.

                    

                   #WAANO. 

si hadaba ayna taasi u dhicin oo aan uga faa idaysano wakhtigeena qaaliga ah ee ilaahay inagu manaystay waxaan talo ahaan ugu soo jeedin lahaa idinka iyo naftaydaba in aan ku mashquulino nafteena wakhtiga fasaxa ah talooyinkaan  soo socda :

1- In qofku isku dayo in uu xifdiyo qayb ka mid ah kitaabka Alle. 

2- In la booqdo dadka qaraabada ah.

3- In wakhti badan lala qaato waalidiinta.

4- In wakhti fiican lala qaato qoyskaaga (ubadka iyo hooyadood).

5- In la booqdo dadka xanuunsanaya.

6- In la booqdo dadka ku jira jeelasha.

7- In la booqdo dadka agooamaha ah.

8- In la akhriyo hal kitaab ama buug ugu yaraan.

9- La shaqaynta dadka  ku hawlan danta guud ee umada.

10- In laga qayb galo hawlaha tadawucnimo sida : wacyi galinta dhanka waxbarashada, la dagaalanka xanuunada, ururinta iyo qaybinta tabarucaadka, ka qayb qaadashada dhisida masaajidada iskooladada iyo madarasadaha, ka qayb galka shirarka bulshada waxtarka u leh.

11- Diyaarinta qormooyinka umada anfacaya.

12- Dhexdhexaadinta khilaafaadka bulshada iyo qoysaska.

Sidoo kale iyadna waxa haboon in laysku dayo in booqasho lagu tago meelaha muhiimka ah ee dhulkeena ka mid ah, taasi oo laga korodhsanayo aqoon guud oo ku saabsan dhulka hooyo, ama la booqdo dadka waayeelka ah ee laga faa'idaysanayo khibrad iyo waayo aragnimo dhanka cilmiga iyo dhanka noloshaba.

Gabagabadii waxaa lagama maarmaan ah in qofka muslimka ahi uu ku bixiyo wakhtigiisa meesha ku haboon si marka ay su'aashu timaado maalinta qiyaamaha uu u helo jawaabta ku haboon.

  عن ابن مسعود، عن النبي صلى الله عليه وسلم قال: «لا تزول قدم ابن آدم يوم القيامة من عند ربه حتى يسأل عن خمس، عن عمره فيم أفناه، وعن شبابه فيم أبلاه، وماله من أين اكتسبه وفيم أنفقه، وماذا عمل فيما علم.» وراه الترمذي.

:Nabiga S.C.W. Waxa laga wariyay inoow yiri [ qofna ka dhaqaaqi maayo maalinta qiyaame meesha uu taagan yahay ilaa la waydiiyo shan arimood], waxa shantaas ka mid ahaa, Cumrigiisa meeshii uu ku bixiyay wakhtigii uu haysatay intii uu noolaa.